صحي الصبح بدري بعد ٣ سنين تعب ، كان خسر كل حاجه المستقبل اللي كان مرسومله ، حبيبته اللي ماستنيتش ، اصحابه اللي مكانش معاه تمن القهوه عشان يقابلهم . بقاله ٥ شهور مخرجش من بيته فجأه فرجت ٠٠٠ حسن لقى شغل من ييجي ٣ سنين كده لما كان ابوه لسه عايش كان حسن عايش ، حسن مات اول مره لما ابوه مات . اصل اللي مالوش ضهر ينضرب على بطنه. مش لازم نحكي عن اعمامه العواجيز اللي سرقوه ولا عن البلطجيه اللي كانوا يضايقوه عشان ياخدوا منه البيت. ولا عن المرتين تلاته اللي الجيران كسروا عليه الباب لما كانوا شاكين انه مات لوحده . حسن اخد فرصه للحياه تاني و نزل فاتح صدره للدنيا كان واقف مستني مواصله لقى شاب صغير شبهه من ييجي كده ٣ سنين واقف جنبه لابس سويتر اسود مغطي راسه بأيسكاب و بيرتعش مع ان الدنيا لسه مش برد حسن حسه شبهه قوى و فجأه مشي الولد و وقف ادام اول عربيه نقل عدت ، جسمه طار في الهوا نزل عند رجلين حسن . https://soundcloud.com/zeinab-farahat/3a-1?in=zeinab-farahat/sets/4vklxlg9xzuh